رد: برنامج تحت الميكروسكوب

السلام عليكم
وانا برشح ام الطلبه

وانا معاكم برشح ام الطلبه

علشان نعرف الشخصيه الجميله دى

وانا كمان ارشح ام الطلبة

وأنا بضم صوتى لصوتكوا ياجماعه وبرشح حبيبت قلبى بجد

****ماما هناء أم الطلبه****

يلا ياقمر كلنا مستنينك على شوق وأكيد ان شاء الله هتكون حلقه خاصه جدا من نوع خاص جدا جدا ..........................منتظرينك !!!

برنامج تحت الميكروسكوب - صفحة 7 Get-7-2009-Giantup_CoM_0bmfo88j

برنامج تحت الميكروسكوب - صفحة 7 Get-7-2009-Giantup_CoM_0bmfo88j

ان شاء الله هناء معانا قريب جدا لانها هى اصبحت الضيف الرسمى للبرنامج فى الحلقة القادمة
واكيد هتبقى حلقة ساخنة جدا ولذيذة لانى ليا الشرف انى استضيف انسانه لم ارى مثلها فى الوجود
التى تتمتع بصفات حميدة................ انا مش عايز احرق الحلقة
استنونا.................................. باى باى Smile

بضم صوتى لصوتكم ونرشح ام الطلبة

وانا بضم صوتى ليكم وبرشح ام الطلبة حبيبة قلبى هناء

انا كمان مستنياكى جدا جدا جا ياهنا تنورى الدنيا كلها

من طرف Ghada الخميس 13 أغسطس 2009, 06:14

فين ام الطلبه بجد شوقتينا

يالا يا ماما اتاخرتى علينا قوى مستنيينك والله وحشتينا

الا من راى الطفل المفارق امه

بعيد الكري عيناه تبتدران

يلا يا اسلام غني لنا( ماما زمانها جاية)

علشان احنا مش هنسكت

الســــــــــــــــــــــــــــــــــــــــــــــــــــلام عليكم ورحمة الله وبركاتــــــــــــــــــــــــــــــــــــــــــــــــــــــــــــــه

اسفه والله يا جماعه على التأخير المواصلات صعبه قوى

اولا بجد بشكر كل الناس اللى رشحتنى ووالله مش عارفه اقولهم ايه وشكرا على الكلام المكتوب بجد هيخلينى اتكلم بصراحة لاتتخيلوها واجاوب على كل الاسئله بصدق ويمكن اسم البرنامج تحت الميكرسكوب يعنى عايز ادق التفاصيل فى حياة الضيف هتكلم لانى بجد محتاجه اتكلم واخرج اللى جوايه بجد اتخنقت من كتر الصمت
بس رجاء هطلب من كل حد عرفنى واتعامل معايا انه يكتب رأيه فيا وبصراحه وعايزة انتقادات لأن الانسان
بيعرف نفسه من خلال صحابه.......................................................... ويلا نبدأ اول سؤال

{عدسة التعارف عبر عن نفسك }

اتكلم عن نفسك

-اسمى: هناء محمود احمد على عبد الهادى
الفرقه الخامسه كلية التمريض جامعة الزقازيق
مركز فاقوس محافظة الشرقيه
اسرتى ...................والدى ووالدتي وأخ وأربع بنات
والدى مدير مدرسه
ووالدتى ست بيت
وأحمد 31سنه محامى
صفاء 29 سنه
منال27سنه
اميره24سنه
شيماء 7سنوات
حاليا باخد كورسات انجليزى وصلت المستوى الرابع الحمد لله وICDL وصلت المديول الخامس وولسه بدأه دبلومةفى ادارة العقل باستخدام البرمجه اللغويه العصبيه ............. احتمال ربنا ييسر يا رب ويكون ليا نصيب واتعين فى مجال التدريس اما فى كليه او اى معهد فنى صحى بس ادعولى
بشتغل فى مدينة العاشر من رمضان فى مستشفى خيرى قسم حضانات اطفال من حوالى ثلاث سنين يعنى وانا فى سنه تانيه كليه كنت بشتغل وبصرف على نفسى والله مش علشان والدى مش قادر لاخالص لان انا اللى كنت
عاوزة اعتمد على نفسى غاويه تعب بس عارفين اجمل متعه انك تحس بذاتك ونفسك على فكرة فى ناس كتير كدة مش انا بس انا والله بقول الكلام ده علشان كل واحد فيكم يحاول يتحمل مسؤلية نفسه كفايه كدة على اهله ومتقولش الكليه والمزاكرة صدقنى هتلاقى ربنا معاك وبيعينك بس دايما اجعل نيتك خالصه لله والله ربنا كان دايما معايا ومبيسبنيش والحمد لله كنت كل سنه بانجح بامتياز وكان ليا ترتيب على الدفعه كمان مش نباهه على فكره بس هيه رضا وتوفيق ربنا للواحد وطبعا بركة دعا الوالدين يااااااااااااااااااااه سرحت فى الكلام معلش

صف نفسك بعشر كلمات ؟

بنـــــــــــــــــــــــــــــــــــــــــــــوتـــــــــــــــــــــــه عاديه جدا هاديه جدا جدا لدرجه تخنق بحب الناس قوى وبحب الاطفال قوى قوووووووووووووووووووووووووى يمكن طموحه زياده عن اللزوم كتيييير اتحملت مسؤليات اكبر منى ومن سنى وكنت فى كل مرة بتحدى نفسى علشان اكون قد المسؤليات دى والحمد لله بتوفيق ربنا واعانته ليا بنجح وبكمل وفى كل مرة بستفيد حاجات لا تتخيلوها وطبعا اهمها ان شخصيتك بتكون قويه
والدى بيعتبرنى ولد يمكن مش بيقولى هناء خالص دايما يقولى يا هانى او يابو هانى اقوله يا عم محمود ده برضو شكل هانى مش عارفه اعمله ايه بس عارفين دى حاجه كويسه جميل قوى انك تحس بالثقه من اقرب الناس ليك وخصوصا ابوك وامك وده طبعا نفعنى فى شغل الجمعيه قوى قوى لما اقوله اروح اى مكان مبيرفضش لانه عارف انا بعمل ايه وبفكر ازاى دايما يقولى ضميرك هوة اللى يوجهك مش انا على فكرة انا بحب الشغل فى الجمعيه بدرجه لا تتخيلوها نفسى نعمل حاجه للمهنه دى بجد نفسى صورتها تتغير عند الناس لأنى بحد عانيت قوى قصدى اتعذبت خلال الثلاث سنين اللى فاتوا خصوصا اصدقاء الممرضه طبعا مش تايهين عنهم يااااااااااااااااااااااااااااااااه سرحت تانى معلش اعزرونى اصلى اكاد اكون مبتكلمش خالص

اجمل طباعك ما هى ؟

يمكن حبى لوالدى ووالدتى دى اجمل حاجه فى حياتى وطبعا حبى للاطفال والناس وأولهم حبى لربى طبعا
واسيب الباقى لبناتى

صفه اتمنى تغييرها فى نفسى ؟

صوتى الهادى مسبب ليا مشكله كبيره قويه ................الانطوائيه واللى الحمد لله بدأت تتغير .............وطبعا الهدوء اللى يخنق ونفسى لماحد غريب او اكبر منى يكلمنى وجهى مش يحمرلان ده بيسببلى احراج لا تتخيلوه
واسيب الباقى برضه لبناتى

ما هى نقطة ضعفك ؟

حبى للاطفال هيه بجد نقطة ضعفى ................................. وحبى للعلم

هل انت راضى عن نفسك ؟

يكفينى رضا ربى ورضا والدى ووالدتى ودعاهم ليا مش عايزة اكتر من كده

حكمه تقريبا هى نهجى فى الحياه؟

{علمت ان رزقى لن يأخذه غيرى فاطمأن قلبى}
{من كثر كلامه كثر سقطه ...............ومن مزح استخف به ..............ومن اكثر من شىء عرف به}
{بكثرة الصمت تكون الهيبه}

آيه قرآنيه دايما ببالى؟

{قل اللهم مالك الملك تؤتى الملك من تشاء وتنزع الملك ممن تشاء وتعز من تشاء وتزل من تشاء بيدك الخير انك على كل شىء قدير }
{ يرفع الله الذين آمنوا منكم والذين أوتوا العلم درجات } صدق الله العظيم

متى تدمع عيناك؟

ببكى لما بشوف حد فرحان قوى................ ودا على فكرة بيسببلى احراج جامد قوى خصوصا لو حد معرفوش
لما اعمل زنب اواحس انى مقصرة فى حق ربنا عليا وأقرأ قرآن وخصوصا سورة الملك وسور ق
لما يكون فى طفل تعبان ومش قادره اعمله حاجه

كلمه سمعتها ومعلقه فى ذهنى ؟
كلمه سمعتها من والدى قالى (هناء !! كلما ارتقى الانسان فى مكانته العلميه كلما ارتقى فى مكانته الفكريه والاجتماعيه)

قالى كمان ان قلبى امانه فى ايديا مش اديه الا للى يستاهله ومش يستاهله الا ربك طبعا اولا وبعدين زوجك ان شاء الله وبجد حطاها قدام عنيا طول الوقت

كلمه كمان سمعتها من حد كان ليه فضل عليا قوى وبجد مش بنكر ده اتعلمت منه حاجات كتيرة قوى وغير فيا حاجات اكتر يمكن من غير ميقصد أو حتى يعرف ومش هخجل انى اقول انه كان بتريق عليا فى بعض المواقف وساعات كنت بخاف اكلمه بس كنت بتعلم كنت كل يوم اروح اكتب انا استفدت ايه النهاردة من تعاملى مع الناس ومع السخصيه دى . دا لانى فضلت عايشة فى بوتقة الانطوائيه فترة كبيرة من حياتى انا يمكن بدأت اتكلم واعمل علاقات مع الناس بس وانا فى سنه رابعه وخصوصا لما اشتركت فى الاتحاد ودى كانت اول مرة فى حياتى اشترك فى نشاط طلابى
كان بيقولى هناء اتعلمى اذاى تشتغلى تحت ضغط وبجد فادتنى قوى

رقم تحبه؟

رقم واحد لان ربنا واحد ادانا عمر واحد حاولوا مش تضيعوا من اديكم املوه بطاعة ربنا والعمل وخدمة الناس لأن ربنا أكيد هيسألك عليه يوم القيامه وادانا برضو قلب واحد علشان نحبه بيه ونحافظ عليه

اجمل خبر تلقيته ؟

خبر تحديد موعد زفاف اختى اميرة بجد كان اسعد خبر فى حياتى وطبعا خبر اعلان الجمعيه

صوت لازم اسمعه كل يوم ؟

صوت الاطفال فى الحضانه طبعا وصوت العجمى

اجمل مرحله مريت بيها ؟

الابيدائى و اخر سنه فى الكليه رابعه طبعا

هل تحب القراءة وما نوعية الكتب واخر كتاب قرأته ؟

القراءة دى حاجه جميله قوى وخصوصا قراءة القرآن والسيرة النبويه وخصوصا سيرة ابن هشام
وبحب اقرأ كتير لإبراهيم الفقى واخر كتاب قريته كيف تسيطر على حياتك لابراهم الفقى وكمان
بقرأ كتب فى فن خطط الشطرنج لأنى بحب اللعبه دى قوى

لو لقيت المصباح السحرى اعمل ايه؟

هقوله انا مش محتاجه لك انا عندى المقدرة والإرادة انى احقق اهدافى وطموحاتى بس ان كان ولابد يعنى ياخد والدى ووالدتى ويزورهم بيت ربنا لانى حاليا مش هاقدر اعمل كده

ورده حمراء وبيضاء لمن تهدى

البيضاء لوالد ووالدتى ..................والحمراء لزوجى ان شاء الله

عدســـــــــــــــــــــــــــــــــــــــــــــــــــــــــــــــــة منتدانا هوانا هواك

ما هو الشىء اللى عجبك فى المنتدى ؟

يمكن التجمع الكبير دة هوة عجبنى

لمن من الاعضاء تقول

الله يخليك لينا

اقول لرئيس الجمعيه الله يخليك للجمعيه علشان تحقق اهدافها

فقدناك
انا بجد مفتقدة ناس كتير بالمنتدى ونفسى اشوفهم (كل بناتى)

اسف اذا زعلتك

اى حد زعل منى فى اى يوم بجد انا اسفه

تفاجئنى دايما –مافى مثلك –احييت المنتدى اسعدتنى معرفتى بك –ما اروعك

بجد كل بناتى فى الزقازيق واللى وحشونى قوى ونفسى اشوفهم ونفسى الايام تعدى بسرعه علشان نتقابل

اسعدتنى معرفتى بك ---ما اروعك

كل الناس فى المنتدى

سخص بالمنتدى نفسى اقابله

دلوعه قصدى مها وحشتييييييييييييييييييييييييييييييييينى قوى يلا بقه ارجعى

عدسة التمريض كله جديد فى جديد

نسبة رضايا عن المستوى التمريضى

قولوا الحمد لله وبأدينا هيتغير ان شاء الله

اذا طلب منى وزير التعليم اقول مقترحات لتطوير التمريض

هاقوله التمريض مش هيتطور الا لما فكر الناس يتطور ................نغير فكر الناس وبعدين هوه هيتطور لوحده

نصائح اوجهها للممرضين والممرضات

اتقوا الله فى عملكم

ما هو الشىء اللى احب اغيرة فى التمريض

بجد قلة الضمير

طموحى بالجمعيه

كبييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييير قوى
يا رب نقدر نعمل حاجه

هل تحب التمريض وبصراحه

بصراحه بحب التدريس اكتر بس طبعا الشغل مع الاطفال حاجه تانيه وخصوصا اللى لسه مولودين بتحس انك بتتعامل مع حاجة من الجنه مفيش غش ولا خداع يمكن اتعلمت منهم حاجات كتير كنت لما بكون متتضايقه ومش اقلاقى حد اكلمه اخد اى طفل واضمه جامد واقعد احكيله همى وقرف ومشاكل الشغل احس انى مرتاحه قوى واقول سبحان الله كل الناس دى كانت فى يوم من الايام زي الاطفال دى لا حول لهم ولا قوة.......... يوه هرجع اسرح تانى

من الذى شجعك على التمريض

بصراحه والدى الله يكرمه ويبارك لى فيه هو اللى حولى من بيطرى وقالى التمريض للبنت احسن من بيطرى بكتير
واقتنعت برأيه لانى كنت خلاص يأست من كل الكليات ذى ناس كتييييييييير حصلهم كده

لو مكتنش اخصائية تمريض لوددت ان اكوب
استاذة جامعيه

لرؤسااء اللجان

انا مش رئيس لجنه انا سكرتير ويجد ناويه اعمل حاجات كتييييييييييييييييييييييييييييرة بس ادعولى

لمااتجوز هشجع ولادى يدخلو التمريض

مش اما ابقى اتجوز لسه بدرى قوى ....وعامة هسيبهم براحتهم مع بعض التوجيه

عدسة النجـــــــــــــــــــــــــــــــــــــــــــــــــــــــــــــاح والكفاح

انجاز حققته فى حياتى العمليه

اولا انى ساهمت فى تأسيس الجمعيه المصريه

ثانيا اكتسبت خبرة كبيرة فى مجالى أهلتنى للعمل بمكان محترم جدا

ماذا اضافت الجمعيه لك

يااااااااااااااه كتير قوى يكفى انى اتعرفت على الناى الجميلة دى

انت شايف نفسك فين بعد خمس سنين

اولا فى مكه اناووالدى ووالدتى بنزور بيت الله

ثانيا استاذة كبيرة فى الجامعه معايا الماجستير والدكتوراه

ثالثا مدرب تنميه بشريه كبير على فكرة دى كلها طموحات واحلام يا عالم تتحقق والا... بس ان شاء الله هتحدى نفسى ذى ما اتعودت وهحاول

كلمه اوجها لرئيس الجمعيه

اقوله(اذا سألت فاسأل الله واذا استعنت فاستعن بالله واعلم ان الامه لو اجتمعت على ان ينفعوك بشىء ان ينفعوك الا بشىء قد كتبه الله لك ولو اجتمعت على ان يضروك لن يضروك الا بشىء قد كتبه الله عليك رفعت الاقلام وجفت الصحف)

استمر ومصركلها معاك يا ريس

وفى النهايه انا عارفه انى طولت قوى بس بجد كنت محتاجه اتكلم كتيييييييييييييييييير وعلى فكرة اتعمدت فى معظم كلامى انى احاول احفزكم واشجعكم من خلال اللى مريت بيه
وبجد نفسى اكون فدتكوا يأى حاجه علشان مش ابقى ضيعت وقتكوا وخلاص لان الوقت ده ربناهيحاسبنى انا عليه
وفى النهايه بشكركوا كلكوا ويا رب اكون عند حسن ظنكوا
ومتنسوش طلبى اول الحلقه

ام الطلبة

بجد كلمات مؤثرة جدا
وأكيد بيدل على شخصيتك
ربنا يحميكى و يحققلك كل اللى تتمنيه بأذن الله

انا ليا الشرف يا ماما اني اكون من اوائل من رد على هذه الحلقة الجميلة المتميزة

ماما ساعات بتقولي روحي لامك التانية تقصدك انتي

هناء انا مش عارفة اقولك ايه بس بجد انا كنت مستنية الحلقة دي بفارغ الصبر

انا اسفة مش هرد عالاسئلة دي دلوقتي عشان اقوم اصلي المغرب

بس بجد مقدرتش اقوم من غير ما ارد رد مؤقت

تقبلو مروري

من طرف Ghada الجمعة 14 أغسطس 2009, 19:18

ربنا يوفقك بجد من اروع الحلقات

ما شاء الله رد جميل جدا ومؤثر بصراحه كلامك بدأ يحببني في الكليه شويا ربنا يوفق الجميع

والله يا هناء انا كنت فاكراكى دكتوره فى الكليه

او على الاقل معيده كبيره فى السن كده

بجد كلماتك روعه ربنا يحميكى يارب

ويخاللى والدك ووالدتك ليكى يارب العالمين

ويكمل عقلك كمان وكامن يارب يا حبيبتى

ويزيد من محبه الناس ليكى يارب العالمين

وبجد كانت من اروع الحلقات

ويللا رشحو معانا مين التالى؟؟؟؟؟

الى صديقتي وحبيبتي هناء
احب اقولك ماتتصوريش كلامك اثر في قد ايه
كان نفسي احضنك جاااااااااااااااااامد
ويارب يحققلك كل الي انتي تتمنيه
لانك طيبه وبتحبي كل الناس
وانا بموت فيكي وانتي بجد وحشتيني
وكل سنه وانتي طيبه ياروح قلبي

والله يا هناء كلامك هو اللى خلانى اشارك فى البرنامج الجميل ده

وبقولك بجد شكرا شكرا جدا انا فعلا كنت محتاج حاجات كتير لاقيتها فى

كلامك وبقولك كل سنة وانتى طيبة ويارب تحققى كل اهدافك وانتى فعلا تستحقى لقب ام الطلبة

شكرا مرة تانية

السلام عليكم ورحمة الله وبركاته
معلش انا اتاخرت عليكم بس كان عندى شويه ظروف وعدت على خير والحمد لله
ازيكم كلكم .............عاملين ايه؟
شوفتم الحلقة الجامده والاكثر من رائعة مع اختى الكبيرة هناء(كل الناس فى الكلية كانت بتحسبها اختى لاننا شبه بعض مش فى الشكل اوى لانها احلى منى بكتير بس فى حاجات كده بتخلينا شبه بعض)
المهم ايه رايكم فى الحلقة دى.................انا مش عارف اقول ايه بجد
صدق اللى سماكى ام الطلبة...........لانى شوفت فيكى صفات كتير تأهلك للاسم ده منها الطيبة..الحنية.....الادب.....الاخلاق العاليه......التدين....الصدق......الامانة على اى شئ.....ايثار الاخرين........بتحبى فعل الخير اوى......بتقف جنب اى حد فينا فى وقت الشدة........دايما تحفزنا على الاعمال الحلوة سواء فى الدين او فى الدراسه والشغل.........كريمه اوى.......تتمتعى بالثقافة الدينية والعلمية..........الصوت الهادى اللى ميزة فيكى وعيب فى نفس الوقت.........وحاجات تانية كتير اوى بس انا مش فاكرها.......كل الصفات دى تستحقى عليها انك تكونى ام الطلبه واختنا الكبيرة بس احنا كده هنكبرك اوى بس انتى مقامك كبير اوى عندنا كلنا والله بجد.

شوفتم ردودها على الاسئله كانت عامله ازاى.........يااااااااااااااه.........والله اجابات مشوفتش زيها قبل كده لانها جاوبت بكل صراحة وطلعت كلام من قلبها وباحساس عالى.

انتى يا هناء اثرتى فيا اوى ونستينى كل همومى وخلتينى ابدا اغير حاجات وحشة فيا كتير اوى
وادتينى شحنة كبير اوى من الهمة والنشاط من اجل فعل الخير والاعتماد على النفس والمشاركه فى كل ماهو يفيد التمريض والبشر كلهم.

والله انا وكل المشاهدين للبرنامج استمتعنا مع الانسانه الاموره .الجميلة...الطيبة......الرقيقة
(ام الطلبة).
وفى نهاية الحلقة بنهديلك يا هناء لقب "نجمة عدسة الكفاح"هو لقب صغير شويه وانتى تستحقى لقب احسن من كده بكتير لانك انسانه مكافحة بمعنى الكلمة وعمله نادرة فى الزمن اللى احنا عايشين فيه واتمنى لكى مزيد من التفوق والنجاح وتحقيق ما تتمنيه.
اتمنى ان تكونو استمتعتم معنا.........والسلام عليكم ورحمه الله وبركاته.

انا برشح للحلقة الجايه عضو نشيط اوى فى المنتدى ولكنه مش مشترك معانا فى الجمعيه لانه من جامعة المنيا انتم عارفين هو مين
.............................................كنزى
يلا كلنا نرشح كنزى ونعرفها اكتر ونعرف منها ايه رايها عن الجمعيه وهى نفسها تعمل ايه الفتره اللى جايه.

وانا معـــــــــــــــــاك ياسلام
بررررررررشح كنزي حبيبه قلبي

**السلام عليكم**

أولا أنا آسفه جدا على التأخير بس بجد كنت مشغوله جدا ياروح قلبى سامحينى.
بصراحه ياهناء أنا مش لاقيه كلام أوصفلك فيه قد ايه انتى انسانه عظيمه وحبوبه ورقيقه مهما قلنا كلنا مش هنعطيكى حقك كلامك مؤثر بجد نابع من جو قلبك وبجد بيوصل لقلوبنا بسرعه ربنا يحميك ويكرمك ويحبب فيكى خلقه ويحقق لك كل اللى انتى بتتمنيه وأشوفك أحسن وأكبر وأجمل دكتوره وأستاذه جامعيه فى النيا دى كلها
ربنا يخليلك والدك و والدتك وتحققى كل أحلامهم وآمالهم فيكى

آسفه انى طولت عليكى بس كل ده وماعبرتش عن حبى واعجابى الشديد بالشخصيه النادره دى وبصراحه أكتر حاجه أنا كسبتها من الجمعيه انى صاحبت القلب الحنون وعرفت انسانه وصديقه بمعنى الكلمه وأتمنى ان الصداقه تدوم بينا حتى لو فرقت بينا الايام

***كل سنه وانتى طيبه ياماما هناء ياحبيبت قلبى ونور عينى من جوه ***
بجد انى أحبك فى الله
مع خالص تحياتى برنامج تحت الميكروسكوب - صفحة 7 Get-7-2009-Giantup_CoM_0bmfo88j

من طرف zalabiaa السبت 15 أغسطس 2009, 22:07

ماشاء الله عليكى ياهناء بجد انتى شخصيه رائعه وتستاهل كل التقدير والاحترام
ربنا يوفقك ويكرمك يارب ويحققك لك كل امانيكى
بجد كانت حلقه من امتع حلقات تحت الميكرسكوب وانتى بجد شخصيه لنا الفخر اننا قدرنا نعرف عنها الحاجات الى هيا قالتها بكل بصراحه دى