مطالب شباب التمريض من اجل مستقبل افضل واروع للتمريض

هدى كتب:انا طالبه فى الفرقه التانيه ومن اهم المطالب اللى انا بتمنى اشوفها فى كليه تمريض الزقازيق
1- اولا اننا نلغى قرار اللى وقعناه اننا نشتغل كتمريض عادى اول مكنا بنقدم للكليه لان فعلا زى مااحمد جمال قال يبقى كان احسن ناخد معهد وخلاص ونريح دمغنا بدال هنشتغل زى الدبلومات او المعاهد مع احترامى ليهم وبجد لازم ناخد وضعنا بئى كاخصائيين تمريض
2- زياده مرتب اخصائيين التمريض وطلبه الامتياز (لان زى معرفت ان الفرق بين خريج كليه التمريض والتمريض العادى 60 جنيه تقريبا ) ودا مش علشان ماديات او حاجه ولكن علشان ناخد وضعنا بجد سواء فى ماديات او وضعنا فى المستشفى
3-انشاء نقابه محترمه للتمريض ويكون رئيسها خريج كليه تمريض (ولما بقول محترمه بجد يعنى حاجه تليق بينا مش زى مزميل فى دفعتنا قال لما رحها لقاها عباره عن اوضتين وصاله وان شقته اكبر منها )
4-بالنسبه لكليتى فى جامعه الزقازيق ياريت بجد بئى المرجات بجد تكون واسعه ونحس بئى انها مدرجات زى كل الكليات مش قاعديين فى فصل فى مدرسه (واللى يدحكك كمان انى لما بقول للاستاذ كمال- كلكم عارفينه طبعا -يااستاذ كمال متريحونا بئى من خنقه المدرجات دى وتبنولنا دور فوق كمان فى الكليه قام دحك وقال الاساس بتاع الكليه اصلا ميستحملش- فقلت فى نفسى فعلا مهى مش زى الكليات التانيه - )
5-وكمان السكاشن حاجه خنـــقه بجد الادوات مش موجوده كلها واللى موجوده بنلصم بيها حاجه تخليك تكتئب ومتفكرش اصلا تهتم بانك تحب حاجه فيها او تطوراو انك تطبق العملى اساسا وياسلام ع التهويه فى السكشن بجد حاجه تخليك تنام (انا اسفه بجد ع كلامى لو هيزعل حد بس بجد دا رايى وراى كتير من زمايلى وصحابى وانا بكتب ع لسان ناس كتير منهم)
6-وبالنسبه لللكتب بئى هما الدكاتره لو مش عايزيين حد يصور الكتب لاما يخفضو سعر الكتاب علشان الكل يقدر يشتريه او يشيلو الشيتات من الكتب لان بجد دا استفزاز للطلبه _مهو يعنى ايه لاما تشترى الكتاب علشان الشيت اللى هينجحك فى الامتحان الشفوى لاما كدا هتسقط حتى لو كنت من اشطر الدفعه وياريت بردو ودا حلم ممكن اكون لوحدى وبعض القليلين بحلمو بيه ان الكتب العلميه الطبيه تكون اكبر من كدا عايزيين فعلا ماده علميه مش بقايا الطب _تشوف لو طالب من طب او طيدله او حتى علوم لما يشوف اى كتاب من كتب تمريض يستغربوا ان دا كتاب جامعه اساسا وبفتكروه مذكره امتحانات سؤال وجواب بجد عايزيين معلومات طبيه وعلميه اكتر من كدا حتى لو للمعرفه والفهم _ويعنى ايه لما دكتور فى طب يقلنا فى الترم الاول انا هحذفلكم الفصل دا ودا اما طلبه طب مقدرش احذف حاجه لان مينفعش دكتور لما يتعامل مع مريض وميعرفش يقله معلش اصل دا اتحذف من عليا (دا ع اساس اننا يعنى نقول احنا معلش بس احنا اتحذف علينا) بجد لما بنسمع الكلام دا من الدكاتره بنتنرفز وبتحرق دمنا ياريت بجد يتعملو معانا احسن من كدا وغيره يقول ان عندنا فى مصر اعظم الدكاتره بس كل الفشل فى التمريض
7-دورات تدريبه للطلبه من دكاتره فى كليه طب وبالمجان ومن غير اى عراقيل سواء ماديه او فى الوقت دورات بيحدد الطلبه هما الوقت اللى مش تتعارض فى اوقات محاضرتهم او السكاشن _تصدق ان دكتور سئلنا ايه هى الاسعافات الاوليه والحمد لله يعنى محدش عرف وياسلام بئى ع كميه الشكر اللى قلهالنا بجد حاجه تكسف واللى زدنا انه بيقول دا انا لو سئلتها لطالبه فى رابعه ابتدائى هيعرفها
8- دورات تدريبه للمعيدااااات _وياريت اللى المعيده اللى ع ادها يعملولها دروس تقويه احسن _لاننا عاملين زى اللى بياخد علم من حد اصلا معندوش علم فبسم الله مشاء الله علم المعلم ع علم المتعلم هيعملو علم خرافى مش موجود اصلا
9- انشاء معمل _زى كل الكليات هو احنا مش كليه عمليه وعلميه بتهيالى ولا ادبيه _ياسلام بئى لو تسئل حد فى دفعتنا او الله اعلم الدفع اللى قبلنا هو ايه ال hematocrit دا هتسمع ابداعات
10_انشاء معمل صوتيات ومرئيات لتحسين اللغه والتدريب عليها علشان نبئى نقول بجد دى خرجتprofessional nurse ونشوف عليها اسطوانات العملى والفيديوهات بطرقه حديثه